Эрдэмтэд: Фитнес бугуйвч хүний сэтгэл зүйгээр тоглодог

Орчин үеийн ухаалаг төхөөрөмжүүд хүмүүсийн өргөн хэрэглээнд нэвтэрсний нэг нь фитнес бугуйвч. Өдөрт хичнээн хөдөлгөөн хийснийг тооцоолон чухам хэдий хирийн калори шатаасныг тооцоолон мэдээлэх энэ төхөөрөмж нь  хөдөлгөөн хийх зорилго, хүслийг бууруулдаг болохыг эрдэмтэд тогтоожээ. 2 жилийн судалгаанд 470 хүнийг хамруулснаар фитнес бугуйвч нь турахыг хүсч байгаа хүмүүст тус болохоосоо илүү ус болдог гэсэн дүгнэлт гарсан байна.  Судалгааны хугацаанд илүүдэл жинтэй хүмүүс өдөр тутам нэг адил дасгал хөдөлгөөн хийж, бага хэмжээний калоритой хүнсний бүтээгдэхүүн хэрэглэж байжээ. Судалгаанд хамрагдагчдын нэг хэсэг нь ямар нэгэн ухаалаг төхөөрөмж ашиглаагүй бол нөгөө  хэсэг нь фитнес трекер буюу фитнес бугуйвчийг ашигласан байна. Нэгдүгээр бүлэгт хамрагдсан хүмүүс дунджаар 6 кг жин хассан бол нөгөө хэсэг нь ердөө 3,5 кг хассан нь тогтоогджээ. Энэ нь ердөө л сэтгэл зүйн нөлөөлөл байсан гэж эрдэмтэн судлаачид үзсэн байна. Бугуйвч хэрэглэдэг хүмүүс өдөрт чухам хэдий хирийн kалорий шатааж байгаадаа анхаарч, өөрийн хийж байгаа дасгал хөдөлгөөндөө сэтгэл нь ханаж, илүү  хэмжээгээр хоол хүнс хэрэглэж өөрийнхөө амжилтаас хойш чангаажээ. Fitbit, Jawbone  зэрэг бугуйвч үйлдэрлэгчид фитнес бугуйвчийн тусыг үнэлэшгүй хэмээн сурталчилдаг бол эрдэмтэд ийм төрлийн бүтээгдэхүүн нь богино хугацаанд нөлөөлдөг гэсэн дүгнэлтийг хийж байгаа юм. Энэ судалгааны дүгнэлт гарсны дараагаар зөвхөн сэтгэл зүйгээр тоглосон бүтээгдэхүүнд  өөрийн мөнгөө хий зарцуулахаас зайлсхийж, идэвхитэй дасгал хөдөлгөөн хийж байхыг хүмүүст зөвлөх болсон байна. Өөрөөр хэлбэл,  таны өмнөө тавьсан зорилгод тань ямар ч ид шидийн саваа фитнес бугуйвч тус болохгүй, та өөрөө өөрийнхөө идэвхи зүтгэлээр л зорьсондоо хүрнэ гэдгийг санахад илүүдэхгүй.