“Дуулиан 2020” тэмцээний 3 дах шатны тоглолтууд үргэлжлэн явагдаж байна.

Өнөөдөр энэ тэмцээний 22 тоглолт Хан-Уул дүүргийн Буянт-Ухаа цогцолбор сургууль,  Баянгол дүүргийн Оюуны Ундраа  цогцолбор сургууль, Чингэлтэй дүүргийн Хоршоолол, Сонгино Хайрхан дүүргийн 65-р сургуулийн спорт заалтанд тус тус  зохион байгуулагдлаа. Хан-Уул дүүргийн Буянт-Ухаа цогцолбор сургуулийн спорт танхимд нийт 8 тоглолт болсноос тоглолтыг Кейси Файн компанийн ивээн тэтгэлэгтэй Хан-Уул дүүргийн 75-р сургуулийн 17 хүртэлх насны баг, Хас Банк ивээн тэтгэгчтэй Ирээдүй цогцолбор сургуулийн багийнхан эхлүүллээ. Хан-Уул дүүргийн аварга 75-р сургуулийн баг энэ удаад өөрийн өрсөлдөгч Ирээдүй цогцолбор сургуулийн багт 8:9-ийн харьцаатай хожигдсон байна. Цагчин шүүгч Ариунжаргал, талбайн  шүүгч Оч-Эрдэнэ, Ганхүү нарын шүүн явуулсан энэ тоглолтын эхний гоолыг Ирээдүй цогцолбор сургуулийн 9 дугаартай тоглогч Г. Анхбаяр тоглолтын 2 дах минутанд орууллаа. Тоглолтын эхний хагаст энэ сургуулийн 4 дугаартай тоглогч Б. Түвшинжаргал хамгийн олон буюу 4 гоолыг оруулж, нийлбэр дүнгээр 1-р үе 8:3-ын харьцаатай өндөрлөжээ. Тоглолтын 2 дах үед 75-р сургуулийн багийн довтолгоо эрчимжиж, 10 дугаартай П. Энхбаяр нийт 4 гоол орууллаа. Хамгийн шилдэг гоолуудыг тэрээр 2 дах үеийн 15-19 минутын хооронд 4 гоол оруулсан нь хөгжөөн дэмжигчдийн анхаарлыг татаж байсан юм. Энэ тоглолтын дараагаар хөвгүүдийн 15 хүртэлх насны Хас Банк ивээн тэтгэгчтэй Буянт-Ухаа цогцолбор сургууль, Аэромонголия ивээн тэтгэгчтэй 47-р сургуулийн багийн тоглолт болсон. 10:4-ийн харьцаатай талбайн эзэн багийн хожлоор өндөрлөсөн энэ тоглолтын хамгийн олон гоолыг 10 дугаартай тоглогч Мөнх-Очир оруулсан байна. Тэрээр нийт тоглолтын туршид 5 гоол оруулсан бол 47-р  сургуулийн 2 гоолыг 32  дугаартай Ням-Иш, 25 дугаартай Ган-Эрдэнэ нар оруулжээ.  Өнөөдөр охидын 13 хүртэлх насны Буянт-Ухаа цогцолбор сургууль, ХАС Холбоо ивээн тэтгэгчтэй 104-р сургуулийн багийн тоглолт болохоор төлөвлөгдсөн байсан боловч 104-р сургуулийн баг ирээгүй учраас өрсөлдөгч багт техникийн  хожлыг өгсөн байна. Өнөөдрийн 4 дэх тоглолт Торгон Мөч компанийн Likenews.mn  сайтын ивээн тэтгэлэгтэй Хан-Уул дүүргийн 18-р сургуулийн 17 хүртэлх насны баг, СонгиноХайрхан дүүргийн  123-р сургуулийн багийн тоглолт байлаа. Бямбасүрэн дасгалжуулагчтай, Дөлгөөнтамир  ахлагчтай 123-р сургуулийн баг дүүргийн аварга шалгаруулах тэмцээнээс эхний 4-рт эрэмбэлэгдэж дараачийн шатанд өрсөлдөх эрхтэй болсон юм байна. Харин 18-р сургуулийн баг дүүргийн аварга шалгаруулах тэмцээнээс хүрэл медаль хүртэж "Дуулиан 2020” тэмцээний 3 дах буюу хотын аварга шалгаруулах тэмцээнд  өрсөлдөх эрхтэй болжээ.

 

 

18-р сургуулийн тоглогч П. Гэрэлт-Од
18-р сургуулийн 12-р ангид суралцдаг. Энэ удаагийн  "Дуулиан” тэмцээнд оролцож байгаа багуудын ур чадвар өмнөх жилүүдийнхээс эрс нэмэгдсэн, хүчтэй, сайн багууд оролцож байна. Манай баг ч гэсэн бас ур чадвараа  сайжруулахад анхаарч байгаа. Манай багийнхан шөвгийн 4-ийн төлөө, улсын аварга шалгаруулах тэмцээний эрхийн төлөө хичээж байна. Багийн тоглогчдын хувьд шинэчлэгдсэн, доод наснаас хэд хэдэн тоглогч орж ирсэн. Тэд нар маань ч бас сайн тоглож байгаа. Багийн хаалгач маань дүүргийн аварга шалгаруулах тэмцээний үеэр гэмтсэн учир хаалгачаа солих хэрэгтэй болсон. Өмнөх жилийн тэмцээнд бид хотын аварга шалгаруулах тэмцээний шөвгийн 8-аас хасагдсан.  1998 оныхны хувьд энэ жилийн тэмцээн хамгийн сүүлчийн тэмцээн болж байгаа учраас шөвгийн 4, улсын аварга шалгаруулах тэмцээний эрхийн төлөө тоглож, амжилтаа ахиулах зорилт тавьсан Энэ ч учраас өмнөх жилүүдийнхээс илүү дамжуулалтандаа анхаарч тоглож байна.
 Тоглолтын 1-р үеийн 2, 5, 7  дах минутанд 18-р сургуулийн 7 дугаартай Хатанбаатар өрсөлдөгч багийн хаалганд бөмбөг оруулсан бол 9, 18  дах минутанд 3 дугаартай Т. Өрнөхбаяр, 12 дах минутанд 5 дугаартай Ганзориг нар тус тус гоол оруулсан юм.  123-р сургуулийн  6 дугаартай тоглогч Цогбаяр 18-р сургуулийн хаалганд 1-р үеийн 15 дах минутанд гоол оруулж, тоглоотын харьцаа  энэ үед 6:1-ийн харьцаатай өндөрлөсөн юм. Харин тоглолтын 2 дах үед 123-р сургуулийн довтолгоо эрчимжиснээр эсрэг багийнхаа хаалганд 7 гоол оруулж чадсан юм. Энэ үед Энхтүвшин дасгалжуулагчтай, Өрнөхбаяр ахлагчтай багийнхан дахин 4 бөмбөг оруулснаар тоглолт 10:8-ын харьцаатай өндөрлөлөө.