Онцлох мэдээ / Нийгэм
22
2017.12.15. 13:45 86 0

УИХ-д хэлмэгдэлтэнд өртсөн иргэдийн эд хөрөнгийг өв залгамжлагчдад нь буцаан олгох тухай хуулийн төсөл өргөн барина

"Монголын Улс төрийн хэлмэгдэгсдийн Холбоо”, "Хүний эрх шударга ёсны хөгжлийн төв” ТББ-ууд хамтран "Улс төрийн хэлмэгдэлтэд өртсөн иргэдээс хураан авсан мал, эд хөрөнгө, өмчийг үр хүүхэд, өв залгамжлагчид нь буцаан олгох тухай” хуулийн төслийг санаачлан боловсруулж, УИХ-д өргөн барихаар болсноо өнөөдэр Үндэсний мэдээллийн төвд хийсэн хэвлэлийн хурлын үеэр мэдэгдлээ. МУ-ын XX зууны түүхэнд гарсан хүний эрхийн гажуудал давтагдахгүй байх баталгаа бүрдүүлэх зорилгоор хэлмэгдүүлэлтэд өртсөн 37 мянган иргэний үр хойчид хохиролыг барагдуулах үйл ажиллагааг зохион байгуулахаар болжээ. "Монгол Улсын төрийн хэлмэгдэлтийн холбоо”-ны тэргүүн Ж. Цогтбаатар: "Төрийн өндөр албан тушаалтнууд "Энэ хэлмэгдсэн хүмүүс дандаа л зовлон ярьж, төрөөс тэжээгдэх гэдэг” гэсэн өрөөсгөл ойлголттой байдаг. Гэвч үгүй юм. Хэлмэгдүүлэлтээс болж тэдний гэр бүл, үр хойч нь нийгмээс хашигдаж, амьдрал ахуй нь доройтсон учраас энэ хуулийг батлах хэрэгтэй юм. Энэ бол ардчилсан нийгэмд байх ёстой зүйл” хэмээн ярилаа. Мөн хэвлэлийн бага хурлын үеэр Хүний эрх шударга ёсны төлөө төв ТББ-ын тэргүүн Ц. Оюунбаатар, хэлмэгдүүлэлтэд өртсөн үр хойчийн төлөөллүүд үг хэлж, хамтран ажиллах "Санамж бичигт” гарын үсэг зурах өнөөдрийн үйл ажиллагаанд оролцоно гэдгээ мэдэгдэв. Хэлмэгдэлт 1936-1940 онд оргил үедээ хүрч, 37 мянга иргэн шүүхээр шийтгэгдэж, 14 мянган лам нар хомроглон буудуулж байсан юм. Монголын хүний эрхийн үндэсний комисс, Монголын цагаатгах ажлыг зохион байгуулах улсын комисс, Дэлхийн нобелийн шагналт "Эмнести Интэрнэйшнл” байгууллагатай хамтран дэмжлэг туслалцаа авах, хэлмэгдүүлэлтийн үг сурвалж, хохиролыг барагдуулах талаар хамтарсан ажлын хэсэг байгуулж ажиллуулах төлөвлөгөөтэй байгаагаа энэ үеэр мэдээлсэн юм.
А. Эрхэмбаяр, П. Сайнжаргал

0 сэтгэгдэл байна.