Онцлох мэдээ / Нийгэм
22
2020.07.2. 16:11 118 0

АНУ-д хураагдаад байсан палеонтологийн олдворуудыг эргүүлэн авчирлаа

Монгол Улсын Засгийн газар Америкийн Нэгдсэн Улсын Дотоодын аюулгүй байдлын яам болон Гааль, Хил хамгаалах албаны байгууллагуудтай 2016 оноос хойш тасралтгүй хамтран ажиллаж, Америкийн Нэгдсэн улсад хураагдаад байсан палеонтологийн олдворуудыг эргүүлэн авчирлаа.

АНУ-д хураагдаад байсан палеонтологийн олдворуудыг эргүүлэн авчирлаа

 


Монгол улсын өв болох протосератоп, тарбозавр, хадрозавр зэрэг үлэг гүрвэлийн олдворууд, тираннозавр батаар үлэг гүрвэлийн гавлын ясыг буцаан авах "Өмч хөрөнгийг харилцан маргаангүй нөхцөлөөр хүлээлгэн өгөх тухай” гэрээнд гарын үсэг зурсан юм. Тухайлбал, Монголын талаас Монгол Улсаас Америкийн Нэгдсэн улсад суугаа Онц бөгөөд бүрэн эрхт Элчин сайд Ё.Отгонбаяр, Америкийн Нэгдсэн улсын талаас Дотоодын аюулгүй байдлын яамыг төлөөлж ноён Роберт Бартоло 2019 оны есдүгээр сарын 26-ны өдөр гарын үсэг зурж гэрээг баталгаажуулсан. Гэрээ хүчин төгөлдөр болж Монгол улсын өв болох дээр дурдсан үлэг гүрвэлийн олдворуудын өмчлөлийн эрх нь Монгол Улсын Засгийн газарт шилжсэн аж. Улмаар АНУ-д суугаа Элчин Сайдын яам олдворуудыг Монгол улсад аюулгүй тээвэрлэж хүргүүлэх ажлыг хариуцан 2020 оны зургаадугаар сарын 24-ний өдрийн ОМ– 7802/23 нислэгээр зохион байгуулж авчирсан байна.

  • Соёлын өвийг хамгаалах тухай хуулийн 52.7 дахь заалт,
  • Засгийн газрын 2019 оны "Соёлын биет бус өвийг эргүүлэн авчрах тухай” 2019 оны 141 дүгээр тогтоол,
  • Боловсрол, соёл, шинжлэх ухаан, спортын сайдын "Ажил зохион байгуулах тухай” 2019 оны А/243 тоот тушаалын дагуу Засгийн газрын хэрэгжүүлэгч агентлаг Соёл, урлагийн газрын даргын 2020 оны 06 дугаар сарын 18-ны өдрийн А/35 тоот тушаал батлагдан ажлын хэсгийн бүрэлдэхүүнийг байгуулсан юм.

Зургаадугаар сарын 30-ны өдрийн 14.00 цагт уг палеонтологийн олдворуудыг хүлээн авч, Байгалийн түүхийн музейн сан хөмрөгт шилжүүлэх ажлыг зохих хууль, дүрэм, журмын дагуу хийсэн байна.

Ийнхүү дэлхийн шим ертөнцийн түүхийн бодит, эх баримт болох ховор олдвор цуглуулгыг эх нутагт нь авчирч, Монгол улсын эртний амьтан ургамлын сан хөмрөг баяжиж байгаагаараа ихээхэн ач холбогдолтой аж.

Хууль бус малтлагын золиос болсон эдгээр олдвор нь хэзээ, хаанаас, газрын гадаргын ямар үе давхаргаас олдсон зэрэг эртний шим судлалын хамгийн чухал анхан шатны суурь мэдээлэл нь алдагдсан. Иймээс судалгаа шинжилгээгээр тэдгээрийг дахин тогтоож, олон улсын стандартад нийцүүлэн баталгаажуулснаар шинжлэх ухааны болон танин мэдэхүйн эргэлтэд оруулах боломжтой.

Эх сурвалж: БСШУСЯ


0 сэтгэгдэл байна.